। श्रम संस्कृति पार्टीका अध्यक्ष हर्क साम्पाङले नेपालमा नागरिकदेखि सांसदसम्म सुरक्षित नरहेको बताएका छन् ।

मंगलबार प्रतिनिधिसभाको बैठकमा बोल्दै साम्पाङले आफूहरू कुन देशमा रहेको भन्ने प्रश्नको उत्तर खोजिरहेको बताए ।

उनले देशमा सुरक्षा, न्याय, सेवा सुविधा र अवसरको अभाव रहेको दाबी गरे । राज्यले नागरिकलाई सबैभन्दा पहिले सुरक्षा दिनुपर्ने भए पनि नागरिक सुरक्षित नरहेको उनको भनाइ छ ।

साम्पाङले भने, ‘हामी देशमा त छौँ तर कस्तो देशमा छौँ भन्ने कुराको उत्तर खोजिरहेका छौँ । यस्तो देश हाम्रो भयो जुन देशको प्रधानमन्त्रीले हामीले छिमेकी मुलुकको सिमाना मिचेका छौँ भन्नुपर्ने, त्यस्तो देश जुन देशमा सुरक्षा छैन । न्याय छैन, सेवा सुविधा र अवसर छैन ।’

उनले नागरिक मात्रै नभई सांसदसमेत सुरक्षित नरहेको बताए । ‘राज्यले सबैभन्दा पहिला दिनुपर्ने सुरक्षा हो । नागरिक आज सुरक्षित छैनन् । सांसद पनि सुरक्षित छैनन्,’ उनले भने।